Sgeulachd eadar-ghnìomhach ann an còig caibideilean le tòimhseachain is gnìomhan Matamataig
’S e sgeulachd eadar-ghnìomhach a th’ ann am Fionn Finity agus Slighe Matamataig an Sù as urrainn dhut a leughadh còmhla ri do chlas no mar theaghlach. Tha tòimhseachain is gnìomhan Matamataig ann, a dh’fhuasglas tu fhad ’s a tha thu a’ leughadh. Ma chuireas tu crìoch air an sgeulachd, leigidh an tòimhseachan mu dheireadh leat duilleag-lìn fhalaichte ‘fhosgladh’ far an urrainn dhut duais bheag a luchdachadh sìos.
Tha an sgeulachd stèidhichte aig Sù Dhùn Èideann, ach faodar a chrìochnachadh bho àite sam bith ann an Alba, cha leig thu a leas thu a bhith aig an sù airson a dhèanamh. Ach, tha an sgeulachd a’ leantainn slighe fhìor tron sù, mar sin ma tha thu a’ tadhal air an sù carson nach lean thu ceumannan Fhinn Finity fhad ’s a tha thu a’ dol timcheall agus a’ dèanamh nan tòimhseachan. Tha mapa againn a’ comharrachadh nan àiteachan far a bheil Fionn a’ stad.
Cò dha a tha e?
Tha an sgeulachd eadar-ghnìomhach freagarrach do sgoiltean, luchd-ionnsachaidh aig an taigh, teaghlaichean agus daoine fa leth a tha dèidheil air sgeulachdan agus tòimhseachain. Tha tionndadh dathte ri fhaighinn, anns a bheil ìomhaighean am measg an teacsa, agus tha dreach teacsa a-mhàin ann cuideachd a tha sònraichte do thidsearan, le taisbeanadh-shleamhnagan gus na h-ìomhaighean a shealltainn air clàr-geal no a leithid.
Dè an aois air a bheil e ag amas?
Ceann shuas na Ciad Ìre tro chun na Dàrna Ìre, mar sin BS3/BS4 gu BS7. Ma tha thu a’ gabhail pàirt mar theaghlach le buidheann aoise mheasgaichte, faodaidh buill nas sine agus nas òige a bhith a’ cuideachadh a chèile gus na tòimhseachain fhuasgladh còmhla.
Ciamar a tha e ag obair?
Tha 5 caibideilean ann, agus crìoch-sgeòil goirid. Leugh gach caibideil, agus an uair sin fuasgail tòimhseachan a’ chaibideil sin. Is e gnìomh tarraing a th’ ann an Caibideil 3 anns a bheil teamplaid a ghabhas clò-bhualadh; faodar na tòimhseachain eile uile a dhèanamh air an sgrion, le peansail agus pàipear airson notaichean a ghabhail, mura h-eil thu airson rudan a chlò-bhualadh.
Tha stiùireadh ann a dh’innseas dhut cuin a bu chòir dhut na tòimhseachain a dhèanamh. Tha fuasglaidhean airson a h-uile tòimhseachan ann (le rabhaidhean ro-làimh gus nach fhaic thu iad gun fhiosta).
Faodar an sgeulachd shlàn a luchdachadh a-nuas mar phasgan, chan fheum thu feitheamh gus an tèid caibideilean sam bith fhoillseachadh, agus mar sin faodaidh tu co-dhùnadh am bu chòir dhut an dèanamh thairis air grunn làithean no an leughadh gu lèir ann an aon sheisean. Gheibhear na luchdachaidhean a-nuas uile gu h-ìosal.
Luchdachaidhean a-nuas
Gus an sgeulachd a chrìochnachadh, feumaidh tu leth-bhreac de na caibideilean agus de na tòimhseachain airson gach caibideil (tha diofar ìrean de dhuilgheadas ann). Cha leig thu a leas am mapa a chleachdadh, ach leigidh e leat an t-slighe a bhios Fionn Finity a’ gabhail tron sù a leantainn. Tha am Faidhle Fiosrachaidh Ainmhidhean roghainneil cuideachd, ach tha fios a bharrachd ann co-cheangailte ri matamataig mu na beathaichean uile a tha a’ nochdadh san sgeulachd.
Thoir fa-near: Is e PDF a th’ anns na faidhlichean uile, ach a-mhàin far a bheil sin air a chomharrachadh.
Chaidh Fionn Finity agus Slighe Matamataig an Sùa leasachadh le Seachdain Matamataig na h-Alba, ann an co-obrachadh le Sù Dhùn Èideann.
Ma chuireas tu crìoch air Fionn Finity agus Slighe Matamataig an Sù, feuch gun innis thu dhuinn! Faodaidh tu dealbhan a sgaoileadh air na meadhanan sòisealta agus tag a chur ann an Seachdain Matamataig na h-Alba/MathsWeek Scotland air Facebook no Bluesky, agus Sù Dhùn Èideann/Edinburgh Zoo air Facebook no Instagram. Na dìochuimhnich an hashtag #MathsWeekScot a chleachdadh!
